Hal-hazırda muzeyin fondunda 8000-ə qədər eksponat qorunub saxlanılır. Bura A.Şaiq və onun ailəsinə məxsus xatirə əşyaları, kitablar, orijinal fotolar, əlyazmalar və sənədlər, teatrla bağlı materiallar, incəsənət əsərləri daxildir. Ekspozisiya otaqlarında A. Şaiqin yazı masası, A.Şaiqin ailəsinə məxsus mebel dəsti, Fransa istehsalı olan əntiq divar saatı, inkrustasiyalı yemək masası, A.Şaiqin yazı masası, şəxsi əşyaları, geyimi, ailədə istifadə edilən mis qab-qacaq və digər maraq doğuran xatirə əşyaları nümayiş etdirilir.

Muzeyin çox zəngin kitab fondu var ki, burada A.Şaiqin şəxsi kitabxanasına məxsus nadir biblioqrafik nəşrlər, onun yaratdığı dərsliklər, əsərləri ilk dəfə nəşr olunan dövrü mətbuat nümunələri, ədibin yaradıcılığına, şəxsiyyətinə həsr edilmiş zəngin ədəbiyyat, oğlu Kamal Talıbzadənin ədəbi yaradıcılığını əks etdirən nəşrlər toplanıb. “Əlyazmaları və sənədlər fondu”nda Şaiqin gənclik illərinə məxsus qəzəl dəftərləri, elmi-pedaqoji, ədəbi-tənqidi əsərlərinin, bədii tərcümələrinin, repressiya dövrü yaradıcılığının əlyazmaları qorunur. Bu qiymətli əlyazmaları əsasında muzeydə yeni kitablar tərtib edilib. “Orijinal fotolar fondu”nda Abdulla Şaiqin həyatını, yaradıcılığını, ədəbi-pedaqoji, ictimai fəaliyyənini əks etdirən maraqlı fotoşəkillər vardır. Muzeyin ekspozisiyasını yüksək sənətkarlıqla işlənmiş rəssamlıq və heykəltəraşlıq əsərləri, süjetli əl xalçası bəzəyir. Mikayıl Abdullayevin, Salam Salamzadənin, Tofiq Kərimovun, Musa Xudayarovun, Əli Zeynalovun, Qafar Seyfullayevin, Asəf Cəfərovun, Nəcəfqulunun, Davud Kazımovun, Natiq Əliyevin, Afət Mahmudovanın yaratdığı incəsənət əsərləri fondun ən zəngin və qiymətli eksponatlarındandır.

Muzeyin kolleksiyasına həmçinin Abdulla Şaiqin böyük qardaşı görkəmli ictimai-siyasi xadim Yusif Ziya Talıbzadənin, oğlu Kamal Talıbzadənin həyat və yaradıcılığı ilə bağlı materiallar (əsərlərinin əlyazmaları, nəşrlər, sənədlər) daxil edilib.

FONDUN ŞÖBƏLƏRİ