24 noyabr 2023-cü ildə saat 14:00-da Abdulla Şaiqin Mənzil-Muzeyində ədibin bacısı Ruqiyə xanımın nəticəsi ədəbiyyat müəllimi, şairə, “Axund Uşaqları” adı ilə tanınan ziyalı və yaradıcı nəslin nümayəndəsi Afaq Rafiq qızının yaradıcılığına həsr olunmuş “Şairə Afaq Rafiq qızı ilə poeziya gecəsi” adlı tədbir keçiriləcək.

Sultanova Afaq Rafiq qızı 1963-cü ildə Bakıda ziyalı ailəsində anadan olub. 1965-ci ildə Azərbaycan Dövlət Universitetinin filologiya fakültəsini bitirib. Üç şeir toplusunun –

“Ad günün mübarək, ruh!” (2000), “Təsadüfi xüsusiyyətləri sil…” (2003), “Ruhun simlərində” (2018) müəllifidir.  Rus dili və ədəbiyyatı müəllimidir.

Təsadüfi deyil ki, Afaq xanımın anası professor, filologiya elmləri doktoru Gültəkin xanım Sultanova (Abdulla Şaiqin bacısı nəvəsi) Azərbaycan ədəbiyyatşünaslığı sahəsində töhfələr vermiş, pedaqoji fəaliyyətlə məşğul olmuşdur.

Poeziya Gecələrinin təşkil olunması muzeyimizdə artıq ənənəyə çevrilib. Tədbirin əsas konsepsiyasını şairənin poeziyası ilə tanışlıq və onun təhlili təşkil edir. Bununla yanaşı, sözü gedən poeziya gecəsində çıxışlar, müəllifin və qiraətçilərin ifasında şeirlər, slayd-şou nümayişi nəzərdə tutulub.

Tədbirdə dəvət olunan qonaqlar ilə yanaşı, muzey əməkdaşları iştirak edəcəklər.