17 oktyabr 2023-cü il tarixdə Abdulla Şaiqin Mənzil-Muzeyində Ümummilli lider Heydər Əliyevin anadan olmasının 100 illiyi münasibətilə “Heydər Əliyev uşaqların gözü ilə” adlı tədbir keçirildi. Tədbir Azərbaycan Respublikası Prezidentinin 28 noyabr 2022-ci il tarixli 3494 nömrəli Sərəncamından irəli gələn tələblərin icra edilməsi məqsədilə keçirildi.

Ümummilli liderin ölkəmizə rəhbərlik etdiyi dövrdə bütün sahələrdə olduğu kimi, uşaq hüquqlarının qorunması, uşaqların sosial müdafiəsinin gücləndirilməsi ilə bağlı genişmiqyaslı işlər görülüb, müvafiq qanunvericilik aktları qəbul edilib. Uşaqların yaxşı təhsil və təlim-tərbiyə alması, Vətən və xalq üçün gərəkli övlad kimi yetişməsi ulu öndərin daim diqqətində olub. Ümummilli lider deyirdi ki, uşaqlar bizim gələcəyimizdir, gələcəyimizi nə cür tərbiyə edəcəyiksə, ölkəmizin, millətimizin, dövlətimizin sabahı bundan asılı olacaqdır. Öz fəaliyyətində Ulu öndərin bu fikirlərini nəzərə alan Abdulla Şaiqin Mənzil-Muzeyi də daim bu qəbildən olan silsilə tədbirlər həyata keçirir.

Tədbirin aparıcıları Abdulla Şaiqin Mənzil-Muzeyinin yanında fəaliyyət göstərən “Vətən” yaradıcılıq dərnəyinin üzvləri idi. Aparıcılar qonaqları salamladıqdan sonra sözü muzeyin direktoru Ülkər Talıbzadəyə verdilər. Ülkər Talıbzadə Ulu öndərin 100 illiyinə həsr edilən növbəti tədbirin Azərbaycan uşaq ədəbiyyatının klassiki, böyük pedaqoq Abdulla Şaiqin müqəddəs ocağında keçirilməsinin rəmzi məna daşıdığını qeyd edib, tədbir iştirakçılarını salamladı. Daha sonra dərnəyin üzvləri müxtəlif şeir və mahnılar söylədilər, Ulu öndərə həsr edilmiş səhnəcik göstərdilər. Ümummilli liderin uşaqlara həsr edilən kəlamlarını əks etdirən video-çarxlar göstərildi. Abdulla Şaiq adına kitabxanın direktoru Yəmən Əmirova, Cəlil Məmmədquluzadənin ev-muzeyinin direktoru Yeganə Məmmədova Heydər Əliyev və uşaqlar mövzusu ilə bağlı xatirələrini, fikirlərini tədbir iştirakçıları ilə bölüşdülər. Sonda Ülkər xanım qonaqlara təşəkkürünü bildirdi. Xatirə fotoşəkilləri çəkildi.