31 may 2023-cü ildə M.Rahim adına 7 nömrəli tam orta məktəbdə “Maşa və ayı” cizgi serialının Abdulla Şaiqin “Tıq-tıq xanım” mənzum nağılının motivləri əsasında çəkilmiş növbəti sayının təqdimat mərasimi keçirildi. 1 İyun Uşaqların Beynəlxalq Müdafiəsi Gününə həsr olunmuş tədbir Abdulla Şaiqin Mənzil-Muzeyinin və 7 nömrəli tam orta məktəbin təşkilatçılığı ilə baş tutdu.

Təqdimat mərasimində M.Rahim adına 7 nömrəli tam orta məktəbin müəllim və şagirdləri, valideynlər, İctimai Televiziya və Radio Yayımları Şirkətinin yaradıcı heyəti, Abdulla Şaiqin Mənzil-Muzeyinin əməkdaşları iştirak etdilər.

Cizgi filmin nümayişindən əvvəl məktəb rəhbərliyi, başda direktor Könül Təhməzova olmaqla Abdulla Şaiqin Mənzil Muzeyinin direktoru Ülkər Talıbzadəni və muzeyin əməkdaşlarını salamlayaraq, bizimlə əməkdaşlıq etməkdən çox razı qaldıqlarını və fəxr duyduqlarını bildirdilər. Məktəb direktoru qeyd etdi ki, nəsillərin tərbiyəvi əsərlər müəllifi olan Abdulla Şaiq istər əvvəlki, instərsə də daha sonrakı nəsillər tərəfindən sevilib və seviləcək. İctimai TV-nin nümayəndələri Cavid Abbasovla Ramina Əliyeva qeyd etdilər ki, böyük tamaşaçı auditoriyasına malik cizgi serialında Azərbaycan nağıllarından bəhs olunması Azərbaycan folklorunun, ədəbiyyatının, mədəniyyətinin yeni nəsil uşaqlara çatdırılması, xarici ölkələrdə təbliğ olunması yolunda böyük əhəmiyyətə malikdir, olduqca önəmli hadisədir. Belə ki, Rusiyanın “Animakkord” studiyasında istehsal edilən cizgi serialında Azərbaycan ədəbiyyatının klassiki Abdulla Şaiqin “Tıq-tıq xanım” mənzum hekayəsi, Azərbaycan nağılı “Cırtdan” Maşanın dilindən nəql edilir. “Maşa və ayı” cizgi serialı ölkəmizdə yeganə yayım hüququna malik olan İctimai Televiziya və Radio Yayımları Şirkəti tərəfindən Azərbaycan dilinə dublyaj edilib. Təqdimat mərasimindən əvvəl məktəbin foyesində Abdulla Şaiqin səyyar sərgisi nümayiş olundu. Əavə olaraq, məktəbin rəqs kollektivi tərəfindən rəqs nümunəsi ifa olundu. Maşanın dilindən Məlikməmməd nağılı da nümayiş olundu.

Sonda Ülkər xanım məktəbin direktoruna, eyni zamanda İTV-nın nümayəndələrinə muzeyin bir neçə nəşrlərini hədiyyə etdi.