13 may 2023-cü il saat 12:00 və 14:00-da Abdulla Şaiqin Mənzil-Muzeyində Beynəlxalq Muzeylər Şurasının (İCOM) təşəbbüsü ilə 1977-ci ildə təsis edilmiş 18 may – Beynəlxalq Muzeylər Gününə həsr edilmiş kukla tamaşası göstərildi. Azərbaycan ədəbiyyatının klassiki, uşaq dramaturgiyasının banisi Abdulla Şaiqin eyniadlı hekayəsi əsasında hazırlanmış “Şələquyruq” tamaşasını Abdulla Şaiqin Mənzil-Muzeyinin əməkdaşları Xətai rayonu 58 saylı orta məktəbin şagirdləri və digər kiçik yaşlı izləyicilər üçün 2 seansda ifa etdilər. Uşaqların maraqla izlədiyi tamaşa balacalar tərəfindən alqışla qarşılandı. Tamaşadan sonra əməkdaşlar əsəri uşaqlarla müzakirə etdilər. Balaca izləyicilər xoşladıqları və xoşlamadıqları obrazların bir cox cəhətlərilə bağlı fikirlərini bölüşdülər. Bu yolla personajların timsalında azyaşlılarda vaxtilə ədibin öz şagird və tələbələrinə əsərləri vasitəsilə aşılamaq istədiyi müsbət insani keyfiyyətlər, pislədiyi mənfi xüsusiyyətlər müzakirə olundu. Tamaşadan sonra hər iki qrupa ekskursiya təşkil edildi və xatirə şəkilləri çəkildi.