16  iyun 2022-ci ildə Abdulla Şaiqin Mənzil-Muzeyində yazıçı-publisist Arzu Hacızadənin  Vətən Müharibəsi Qəhrəmanı “Terminator”  ləqəbli  Mehrab Söhrab oğlu Niftəliyevin qəhrəmanlıq yoluna həsr olunmuş “Cəsur ürək” kitabının təqdimatı keçirildi.

Tədbir Azərbaycan Respublikasının Prezidenti cənab İlham Əliyevin 2022-ci il 05 yanvar tarixdə imzaladığı Sərəncama əsasən 2022-ci ilin “Şuşa ili” elan edilməsi ilə bağlı keçirilən tədbirlər silsiləsinə aiddir.

Kitab Xüsusi Təyinatlı Qüvvələrin baş giziri, sağlığında əfsanəyə çevrilən “Terminator” ləqəbi ilə tanınan Mehrab Niftəliyev 44 günlük Vətən müharibəsində  Murov dağ yüksəkliyindən Şuşa qalasına kimi qəhrəmanlıqla dolu ağır bir döyüş yolundan bəhs edir. O, bu döyüşlərdə düşmənin  70-ə yaxın hərbi qulluqçusunu, neçə-neçə döyüş texnikasını məhv etmişdi.

Mehrab Niftəliyev 2005-ci ildə Azərbaycan Respublikası Silahlı Qüvvələrinin Təlim və Tədris Mərkəzinin “Gizirlərin hazırlanması kursunu bitirmişdi. Azərbaycan Respublikası Müdafiə nazirinin 18 fevral 2005-ci il tarixli əmri ilə “baş gizir” rütbəsi verilmişdir. O, 17 il xüsusi təyinatlı alayda müxtəlif vəzifələrdə qüsursuz xidmət etmişdir. 2016-cı ilin Aprel döyüşlərində də qəhrəmanlıqlar göstərib.

Mehrabın ən böyük arzusu Şuşaya Azərbaycan bayrağını sancmaq idi. Məhz elə bu arzu ilə 2020-ci il noyabrın 8-də Şuşa şəhəri ərazisində gedən hərbi əməliyyatlar zamanı döyüş tapşırığını yerinə yetirərkən qəhrəmancasına şəhid olub.

Azərbaycanın ərazi bütövlüyünün bərpa edilməsində xüsusi xidmətlərinə və işğal olunmuş ərazilərin azad olunması zamanı düşmənin məhv edilməsi üzrə qarşıya qoyulmuş döyüş tapşırığını yerinə yetirən zaman göstərdiyi qəhrəmanlıq nümunəsinə görə, həmçinin hərbi qulluq vəzifəsini yerinə yetirən zaman igidlik və mərdlik nümayiş etməsinə görə Azərbaycan Respublikasının Prizidenti İlham Əliyevin 09.12.2020-ci il tarixli sərəncamına əsasən “Vətən Müharibəsi Qəhrəmanı” , “Vətən Uğrunda” və müxtəlif rayonların alınmasında göstərdiyi şücaətə görə medallarla təltif olunub.

Tədbiri Abdulla Şaiqin Mənzil-Muzeyinin direktoru Ülkər xanım Talıbzadə giriş sözü ilə açdı və Vətən müharibəsində şəhid olmuş qəhrəmanların ruhu bir dəqiqəlik sükutla yad edildi. Ülkər xanım bu kitabın təqdimatının məhz Abdulla Şaiqin Mənzil-Muzeyində keçirilməsinin xüsusi əhəmiyyətə malik olduğunu, Abdulla Şaiq və qardaşı Yusif Ziya Talıbzadənin də türkçülük, vətənpərvərlik ideyalarını öz yaradıcılıq və həyatlarında geniş təbliğ etdiklərini, Abdulla Şaiqin yaradıcılığında vətənpərvərlik mövzusunun xüsusi yer tutduğunu, Yusif Ziya Talıbzadənin də ömrü boyu vətənin müstəqilliyi, millətin bütövlüyü uğrunda mübarizə apardığını və onun da şəhidlik zirvəsində ucaldığını vurğuladı.

Daha sonra tədbir aparıcısı Günel Əsədova sözü təqdimatı keçirilən kitabın müəllifi yazıçı-şair Arzu Hacızadəyə verdi. Arzu xanım öz növbəsində gələn qonaqları salamladı və bu kitabı ərsəyə gətirməyinin səbəblərindən, bu yolda çəkdiyi çətinliklərdən və bu kitabın onun üçün nə qədər vacib olduğundan danışdı.

Müəllif sözü şəhid Mehrab Niftəliyevin atası Söhrab müəllimə verdi. O, oğlunun keçdiyi qəhrəmanlıq yolundan, igidlik zirvəsindən danışaraq qeyd etdi ki, Mehrab hər zaman vətəninə bağlı olub, onu ürəkdən sevib.

Sonra Tarix elmləri doktoru Təranə Turan Rəhimli çıxış etdi. Təranə xanım da öz fikirlərini bölüşdü. Şəhidin anası Xalidə xanım isə başlarına gələn bu hadisə haqqında ürək ağrısı ilə danışdı.

Tədbirdə bədii hissə nümayiş olundu. Bədii hissədə 58 nömrəli tam orta məktəbin şagirdləri “Cəsur ürək” əsərindən səhnəcik göstərdilər, vətən, vətənpərvərlik mövzusunda müxtəlif şeirlər səsləndirdilər.

Tədbirdə şəhid Mehrab Niftəliyevin ailə üzvləri, şəhid anaları, dostları, silahdaşları və qazilər, KİV nümayəndləri iştirak və çıxış etdilər.

Sonda qonaqlarla xatirə fotoşəkilləri çəkildi.