16 iyun 2022-ci il tarixdə saat 13⁰⁰-da Abdulla Şaiqin Mənzil-Muzeyində Vətən Müharibəsi Qəhrəmanı “Terminator” ləqəbli Mehrab Söhrab oğlu Niftəliyevin qəhrəmanlıq yoluna həsr olunmuş “Cəsur ürək” (sənədli povest) kitabının təqdimat mərasimi keçiriləcək. Tədbir Azərbaycan Respublikasının Prezidenti cənab İlham Əliyevin 05 yanvar 2022-ci il tarixli sərəncamı ilə 2022-ci il Azərbaycan Respublikasında “Şuşa ili” elan edilməsi ilə bağlı həyata keçiriləcək. Şuşa fatehi baş gizir Mehrab Niftəliyev 17 il xüsusi təyinatlı alayın xüsusi təyinatlı qrupunda xidmət etmişdir. 2016-cı ilin aprel döyüşlərində qəhrəmanlıqlar göstərmişdir. 44 günlük II Vətən müharibəsində Füzuli, Cəbrayıl, Zəngilan, Qubadlı, Murovdağ istiqamətində gedən döyüşlərdə düşmənin 70-ə yaxın hərbi qulluqçusunu, neçə-neçə döyüş texnikasını məhv etmişdir. M.Niftəliyevin ən böyük arzusu Şuşaya Azərbaycan bayrağını sancmaq idi. Mehrab Niftəliyev 08 noyabr 2020-ci ildə Şuşa uğrunda gedən hərbi əməliyyatlar zamanı döyüş tapşırığını yerinə yetirərkən qəhrəmancasına şəhid olub.