Abdulla Şaiqin Mənzil Muzeyi

Abdulla Şaiqin Mənzil-Muzeyinə maraqlı ziyarət

Muzeyimizi xaricdə, Hollandiyanın Utrecht şəhərində yaşayan soydaşımız Rəyanə Məlik-Aslanova ziyarət etdi. Rəyanə xanım tanınmış Azərbaycan ziyalılarından olan Hacı Ələkbər bəy Nəsibbəylinin nəvəsidir. Olduqca qiymətli məlumatlara malik olan Rəyanə xanımın sözlərinə görə, görkəmli şair, yazıçı, dramaturq, böyük pedaqoq Abdulla Şaiq və böyük qardaşı dövrünün tanınmış hərbçisi və publisist-yazıçısı olan Axund Yusif Ziya Talıbzadə onun nənəsinə və nənəsinin bacılarına müəllimlik edib. Abdulla Şaiq Azərbaycan dili və ədəbiyyatı, Axund Yusif Ziya Talıbzadə isə şəriət dərsləri keçib. Bir çox xatirələri nənəsindən eşidən həmyerlimiz, Bakıya gələr-gəlməz muzeyimizi ziyarət edərək bu qiymətli məlumatları bizlə də bölüşdü. Azərbaycanı çox sevdiyi bildirən Rəyanə xanım, muzeyin rəy kitabına öz fikirlərini yazdı və bizə çox təşəkkür etdi.