6 noyabr 2021-ci ildə Abdulla Şaiqin Mənzil-Muzeyində muzey və “Əmanət – Şəhid və Qazi Övladlarının Fərdi İnkişafına Dəstək Layihəsi” üzvlərinin birgə təşkilatçılığı ilə İkinci Qarabağ müharibəsinin ildönümü – Zəfər bayramı münasibətilə “Zəfər bizə əmanətdir” adlı tədbir keçirildi. Tədbir 44 günlük Vətən müharibəsində qəhrəmancasına şəhid olmuş vətən oğullarına, onların həyat yollarına və bizə yaşatdıqları qələbəyə həsr edildi.

Tədbirdə vətən müharibəsində şəhadətə qovuşanların ailə üzvləri, qohumları, müharibə veteranı, kitabxana və muzey əməkdaşları, məktəblilər, KİV nümayəndələri iştirak etdilər.

Azərbaycan Respublikasının Dövlət Himni ilə açılan tədbir daha sonra şəhidlərimizin ruhunun bir dəqiqəlik sükutla yad edilməsi ilə davam etdi.

Çıxış üçün ilk söz muzeyin direktoru Ülkər Talıbzadəyə verildi. O, tədbir iştirakçılarını salamladı və Vətən müharibəsində canından keçən vətən oğulları ilə bağlı fikirlərini bölüşdü. Növbəti söz şəhadətə qovuşanların ailələrinə verildi. Şəhid Camal İsmayılovun ailə üzvü Cəvahir xanım Camalın döyüş yolundan danışdı və ona həsr etdiyi şeiri söylədi. Aktyor, bədii qiraətçi Kamal Yaşar öz çıxışında Şaiq ocağında belə bir tədbirin keçirilməsini alqışladı və bizə bu zəfəri yaşadan şəhidlərin qəhrəmanlığından danışdı. O, uşaqlara təhsilin çox vacib olduğunu, əgər yaxşı təhsil alsalar atalarına layiq olacaqlarını və bu günü qəm, kədər günü kimi yox, göz yaşlarının axıdıldığı gün kimi yox, məhz sevinc günü kimi qeyd etməklərini məsləhət gördü. Tədbirdə şəhid övladları, məktəblilər vətənpərvərlik mövzulu şeirlər söylədilər. Tədbir “Əmanət – Şəhid və Qazi övladlarının Fərdi İnkişafına Dəstək Layihəsi”nin rəhbəri Turan Hüseynovun çıxışı ilə davam etdi. Sonda A. Şaiqin Mənzil-Muzeyi birgə keçirdikləri tədbirə görə tədbir iştirakçılarına təşəkürünü bildirdi və şagirdlərə təşəkkürnamələr təqdim edildi.